Etazini mete gwoup gang viv ansanm nan lis gwoup teworis yo
Etazini mete gwoup gang Viv Ansanm, ki se yon alyans gang ki gen anpil pouvwa ann Ayiti, sou lis « gwoup teworis transnasyonal » vandredi, selon sa Depatman Trezò Ameriken pibliye sou sit entènèt li. Manm gwoup sa a pran kontwòl prèske tout kapital Pòtoprens epi yo gaye nan zòn ki bò kote yo.
Depatman Trezò a mete tou gang Gran Grif sou menm lis la. Se gang sa a ki te pran responsabilite pou yon masak ki te fè pè anpil moun nan mwa oktòb, kote pou pi piti 115 moun te mouri nan vil Pont-Sondé.
Konflit gang yo an Ayiti pa jwenn anpil repons nan kominote entènasyonal la, pandan peyi vwazen yo kontinye depòte imigran tounen nan peyi Karayib sa a, malgre Nasyonzini mande pou yo sispann sa pou rezon imanitè.
Plis pase 1 milyon moun deja deplase akoz vyolans lan, epi gen plizyè dizèn milye lòt ki oblije kite kay yo pandan kèk semèn ki sot pase yo, pandan zak vyolans lan ap gaye nan sant peyi a. Sa lakòz plis sant sante fèmen epi plis moun tonbe nan ensekirite alimantè grav.
Gen enfòmasyon ki soti nan Ajans Reuters ki nan atik sa.
